【沪语悦读】有趣个上海闲话

上海老底子每天呈送精彩文章一组

打开尘封的记忆，寻觅往昔的岁月

叙上海老底子事 忆上海老底子人

诉上海老底子情

有趣个上海闲话

作者：徐子亮

沪语改写、讲述：黄燕琼

审核、推荐：丁迪蒙

编辑：王乙其

上海闲话是吴方言个一种。上海闲话勿如苏州闲话软，勿及无锡闲话糯，勿比宁波闲话爽，但是啊，上海闲话形象、生动，邪气幽默，充满了画面感，表现力也邪气强。搿眼特点，常庄体现勒勒上海闲话个词语当中。

“搿个人做事体脱头落襻”，搿句闲话讲个是：某人办事体勿周全，丢三拉四个。传统个中式服装，纽子多数是利用衣料个余料手工做成功个各种盘花紐。

盘花紐分为紐头搭仔紐襻。“脱头落襻”搿个词原来指个是缝制个衣裳，或者缺少了紐头，或者缺少紐襻，勿齐全了。后首来引申为做事体，呒没计划，勿周全，缺了搿个少伊个。因此，讲到“脱头落襻”就会得让人想到一件衣裳少了紐头或者紐襻，邪气形象。

“张先生总归着得山青水绿”，此地个“山青水绿”是借用自然风景来形容人个衣着清爽整洁。由山青水绿而联想到人个服饰整齐清洁，拨人有种邪气写意个视觉感受。

再比方讲“孵”，原来个意思是指母鸡伏勒鸡蛋浪向，用伊个体温让胚胎发育成为小鸡，叫做“孵小鸡”。上海闲话拿“孵”个意思引申为“长时间蹲勒一个地方”。所以，冷天介勒澡堂里汏浴叫“孵混堂”；热天介蹲勒有空调个场所叫“孵空调”；晒太阳叫“孵太阳”；勒茶馆店里吃茶叫“孵茶馆”；呒没工作，闲居勒屋里向叫“孵豆芽”。一个“孵”字，拿伊种介闲适而近似于无聊个状态表现得是淋漓尽致呀。

上海闲话勿仅生动、形象，有个还邪气幽默个。举只例子，上海人讲“吃素碰着月大”是比喻“勿凑巧”。吃素指个是吃斋念佛。吃斋形式多种多样，有得吃长素，荤腥勿碰个；有得只有初一、十五吃素个；也有得碰着某个号头吃素个咾啥。“吃素碰着月大”指个是吃了一个号头素食个人，看看日脚已经可以开荤了，偏生碰着是大月，又要多熬吃一日天素。搿句闲话用描述个方式表现了“勿凑巧”个意思，生动之中透出了幽默。

再譬如讲，“夹忙头里膀牵筋”，指个是：勒勒邪气忙乱当中偏生碰着脚抽筋了，呒没办法动。搿个熟语也比喻“勿凑巧”，但语义着重于突然之间碰着个麻烦。通过生动个场景描绘让人产生联想，想象勒紧张、忙碌当中突然因为脚抽筋而无法行动个痛苦、窘迫状态。

上海勒十九世纪中叶已经搭国外有得往来了。长期搭海外交流，使得上海闲话里向融入了勿少个外来语。比方讲“色拉”（salad/凉拌菜）、“白脱”（butter/黄油）、“司的克”（stick/手杖）、“水门汀”（cement/水泥）等等音译词个使用。又比方讲，上海闲话里向个“拉司克”形容“最后”，“麦克麦克”形容邪气“多”，咾啥，侪是借用英文，是音译词。“拉司克”是英语“last car”个谐音，由“最后一班车”引申为“最后”；而“麦克麦克”呢，是英文“much, much”个谐音。再比方讲：“肮三”，有种讲法认为搿是从英文“on sale”转化来个。“on sale”原来是指物事用低价出卖，又引申为物事质量勿好，或者人个素质比较差。后首来用“肮三”表示“差劲”、“让人讨惹厌”。譬如“搿个人老肮三个”，意思是“搿个人素质差，老推扳个。”

还有勿少词语是音译个外来语再结合汉语词语组成功个。比方：罗宋汤、色拉油、高尔夫球、混枪势等。

罗宋汤开始辰光是到上海来个俄罗斯人为了生计、或者是为了服务侨民而制作个一道俄式汤品，原料是牛肉、洋山芋、洋葱等十多种菜蔬，烹制而成个。罗宋汤勒西菜馆推出之后，上海市民也邪气接受。上海闲话拿“Russian”读作“罗宋”，译音再加中文个“汤”，就变成功了罗宋汤。以此类推，还产生了罗宋帽、罗宋面包咾啥。

“混枪势”里个“枪势”来源于英文“chance”，意思是机会、机遇，也指“碰巧”、“偶尔发生”。“枪势”搿个词原来是用勒康乐球个游戏当中个，后首来也指代人个社会能力。假使人个社会能力差，日脚过得勿称心，就称为“混枪势”。再后来进一步拨引申为“消极、敷衍、瞎混”个意思。打只比方，“伊根本呒没认认真真看过，就是勒混枪势嘛”。意思是“他根本没认真看过，就是在敷衍、瞎混。”

上世纪二十年代，上海已经成为了中国重要个通商大港。频繁个商务活动也影响了上海闲话，使得上海闲话个日常用语里向出现了交关商业用词，像“现开销”“翻老账”“敲定”“耳朵打八折”咾啥。

“现开销”搿个词，原来是指商务活动当中“当场付款”个意思，后首来引申为“当场回击”。像“搿趟我拨伊只面子，呒没现开销”，意思是“这次我给他个面子，没有当场回击他”。

还有“敲定”，原来也是商业用语。勒勒拍卖行里，当某位买主报出价钿没人竞买个辰光，主持拍卖个人就用木榔头敲台子，用来表示生意成交。以后，商业活动当中就称买卖成交为“敲定”。后来又引申为双方勒某桩事体浪向达成协定，或者事体定下来之后勿再改变。像“阿拉就搿能敲定，明朝十点钟机场碰头”，意思是“我们就这样说定了，明天十点钟机场见面”。

“打折”个意思是按成数来降低商品个定价出售。“耳朵打八折”是指呒没听清爽或者听力下降，应该听全个内容只听了八成。像“叫侬覅买，哪能又买来了，侬耳朵打八折啦？”意思是“让你别买怎么又买来了，你没听清楚吗？”或者“年纪大了，耳朵打八折”，意为“年纪大了，听力下降”。富有表现力个上海闲话融入了外来语，并且借用了勿少商业词语，体现出上海闲话具有邪气强个包容性。

生活勒上海，学一眼上海闲话，感受感受上海个文化氛围，侬会得更加深切个体会到上海个丰富多彩搭富有情趣。

讲述：黄燕琼

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年出版社

《实用沪语》复旦大学出版社

《上海话绕口令》少儿出版社

《上海方言词语使用手册》上海教育出版社

《上海话读成语故事》少儿出版社

《囡囡学童谣》，少儿出版社。

转自：“启迪心田沪语”公众号

我知道你在看哟~

本站是提供个人知识管理的网络存储空间，所有内容均由用户发布，不代表本站观点。请注意甄别内容中的联系方式、诱导购买等信息，谨防诈骗。如发现有害或侵权内容，请点击一键举报。