【沪语悦读】豫园“三穗堂”个故事

上海老底子每天呈送精彩文章一组

打开尘封的记忆，寻觅往昔的岁月

叙上海老底子事 忆上海老底子人

诉上海老底子情

豫园“三穗堂”个故事

来源：黄浦文博

作者：薛理勇

改写：郭莉

讲述：洪瑛

审阅、推荐：丁迪蒙

编辑：王乙其

“三穗堂”是豫园个主殿，知名度邪气高。“穗”是谷类植物个颖果，譬如稻穗、麦穗咾啥。一般来讲，一支稻麦长一支穗。古人希望一支稻麦多长几支穗头，粮食产量就可以提高，所以假使发现一支谷类植物长了两支穗头，就叫做“嘉禾”，是好兆头，寓意风调雨顺、国泰民安。

民国以后，“嘉禾”取代了清朝个龙图案，经常勒勒货币、徽章浪向使用，还拿国家颁发拨有功人员个勋章叫做“嘉禾勋章”。嘉禾勋章分九等，侪用“嘉禾”为图案。中华人民共和国成立以后，国徽个图案浪向也有得“嘉禾”。

豫园“三穗堂”蛮容易拨误解为“长了三支穗头个稻谷”，迭个勿是比“嘉禾”还要好个兆头吗？交关人也侪是搿能介理解个。

但是，弄错脱唻！

豫园“三穗堂”曾经作为上海县“万寿宫”使用，碰到国家庆典、皇帝生日，地方官吏、文人绅士要勒此地庆祝皇帝万寿无疆；碰着中央政府有得重大个事体，地方官员侪要勒此地“宣讲圣谕”；平常辰光，读书人也要勒此地谈经论道。总而言之，“三穗堂”好像一直是“读书人俱乐部”。现在还好看到三穗堂正上方有“三穗堂”大匾，匾浪向刻勒海：“大殿落成即以'三穗’题之”，辰光是“乾隆三十二年”，也就是1767年。匾个左侧有得题识，讲“三穗”名称个来历，因为匾忒高，字又忒小，室内光线也忒暗，一般是看勿清爽个。

我因为要编写《文以兴游》一书，豫园管理方特地搭好高扶梯，让我爬上去看过。匾个题跋是关于“三穗堂”名称个来历：“三穗”出典于《后汉书·蔡茂列传》。我就来讲讲迭位蔡茂搭仔“三穗”个故事。

东汉湖阳公主丈夫早逝，她搭弟弟光武帝刘秀一道相中了大司马宋弘，但是宋弘已经有得妻室了，又勿可能纳湖阳公主为妾，宋弘也不愿意休特糟糠之妻。刘秀去说媒，宋弘回答皇帝：“贫贱之交不可忘，糟糠之妻不下堂”，谢绝了。其实，皇帝也勿希望自家个大臣抛妻另娶，就迭能不了了之，湖阳公主因此心生不满。湖阳公主一向是飞扬跋扈，屋里向个家奴也是骄横放肆，当街杀人，激起了民愤，造成京城骚动。交关官吏迫于公主个威权，敢怒勿敢言，只有蔡茂挺身而出，搭皇帝提出忠告，一定勿好让外戚干预朝政。因此，蔡茂是中国历史浪公认个优秀官吏，是官吏个楷模。

《后汉书·蔡茂列传》记载：蔡茂，字子礼。西汉末东汉初人，当初蔡茂是广汉太守，有一日，伊做梦，梦到自家坐勒大殿个大梁浪向，梁浪向有一支长了三只穗头个稻禾，伊去拿了贴当中个一支，梦就醒了。于是，蔡茂就请手下头个官吏郭贺圆梦，郭贺讲：大殿是皇家宫殿个象征，侬梦里向坐到大殿个大梁浪，迭个就是“栋梁之材”，梁浪长出三只穗头个稻禾，迭个“三穗”就代表朝廷当中地位最高个、尚书省里向中台、外台搭仔宪台，而侬又抽到“中穗”，就是“中台”，看来，侬就要做尚书，也就是宰相了。假使用拆字法分析，侬拿到“禾”就醒过来，失脱了还有两支，“禾”跟“失”合起来就是“秩”字，“秩”，就是俸禄，看来，侬老快就要进京，做朝廷命官了。真个，一个号头之后，蔡茂就应召进京当了司徒，位列三公。郭贺呢，也随蔡茂进京，当了司徒个助手。所以，词语“三穗”就是“官运亨通”个意思。

“三穗堂”以前是上海个“读书人俱乐部”，迭个“三穗堂”个名称，学问蛮深，也是蛮好白相个。

顺便补一句，现在个照相机功能齐全，可以勒暗个房间里，拍到清晰个照片，假使侬有机会到豫园去，勿妨去拍一张“三穗堂”匾个照片，认认真真看看，仔仔细细想想。

恭喜侬开年官运亨通，升官发财哦！

作者：薛理勇

讲述：洪瑛

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年出版社

《实用沪语》复旦大学出版社

《上海话绕口令》少儿出版社

《上海方言词语使用手册》上海教育出版社

《上海话读成语故事》少儿出版社

《囡囡学童谣》，少儿出版社。

转自：“海上梦叠”公众号

我知道你在看哟~

本站是提供个人知识管理的网络存储空间，所有内容均由用户发布，不代表本站观点。请注意甄别内容中的联系方式、诱导购买等信息，谨防诈骗。如发现有害或侵权内容，请点击一键举报。